ꈢꋒꁧꌠꀋꉬꀞ
ꁱꊿ:ꑘꑦꉸ
ꀘꊿ:ꌟꃨ
ꐋꀨꀋ
ꃅꃴꃅꄂꑄꌦꏓꌦꃅꀐꂼ
ꄂꐎꄁꆈꆏꂅꉢꂅꏿꇰꃲ
ꋋꆹꂷꉐꀀꑌꇴꌠꉬꑴꀞ
ꃅꑌꃅꋆꆏꒉꉢꇁꃅꀐꂼ
ꃅꑍꃅꉖꆎꐂꉠꂴꅞꇰꃲ
ꋋꆹꄮꈉꐙꃰꏿꇯꌠꉬꇊ
ꐋꀨꇆ
ꀋꉊꋍꃢꇬꆹ
ꌺꃰꌩꈪꀵ
ꅩꃰꇂꁮꌌ
ꑌꀑꌕꆪꈛꌎꆲꏂꄓ
ꍵꀑꌕꆪꈛꌎꍑꒉꇗ
ꀉꄉꆞꑭꋍꑍꌕꃢꈘ
ꀉꂿꐂꇓꋍꑍꌕꃢꃴ
ꀻꑳꇂꃴꂷꇭꌥꌦꄓꌦꃅ
ꇢꇑꁨꁧꀉꂿꑌꌦꉆꌦꃅ
ꀋꀨꀉꁘꅋꁁꊰꃢꏿꃅꈚ
ꃢꈜꀉꁘꊰꑋꋍꃢꋌꃅꈚ
ꑳꈫꑳꇋꃮꁮꃬꊭꏭꃰꏿ
ꑳꐮꑳꉎꉌꊭꉌꇓꑘꀕꇖ
ꏂꆨꃰꊿꈻꐚꏿ
ꃮꆪꃰꊿꂮꐚꏿ
ꐋꀨꀋ
ꀋꃅꋋꄮꆏ
ꑳꐮꍯꃅꅔꃅꏠꐕꂾꃚꉼꏑꀕ
ꑷꈓꄆꁱꄆꒌꋧꃅꐮꐊꇬꀀꌐ
ꑳꉎꐕꍯꉻꍯꁦꄵꇈꈴꏿꇰꃲ
ꈜꉐꇓꂃꀋꄓꃲ
ꈜꐯꆲꏂꀋꄓꃲ
ꃮꆪꂮꈜꀋꁮꃲ
ꏂꆨꈻꈜꀋꁮꃲ
ꋋꆹꈢꋒꁧꌠꀋꉬꀞ
ꋋꆹꉪꊈꐥꐨꐛꏀꁏꌠ
ꐋꀨꇆ
ꀋꉊꋍꃢꇬꆹ
ꆀꃅꃰꊿꇆ
ꀉꑳꌌꇁꎆꄂꆫ
ꆀꃅꀉꑳꇆ
ꒈꀑꒈꂪꊨꀋꄅ
ꁭꅐꁮꐚꇬꀋꌧ
ꆀꉙꎰꉙꐭꀋꈴ
ꆀꃅꁡꇤꇆ
ꐋꀨꀋ
ꀋꃅꋋꄮꆏ
ꆀꃅꀉꑳꂘꑳꇂꃴꑌꄉ
ꆀꐊꆀꉙꍅꇙꀕꇰꃲ
ꉷꐊꉷꉙꇔꍣꀕꇰꃲ
ꆀꃅꃰꊿꆀꇁꉷꃅꐥꌐꃲ
ꆀꌺꉷꌺꆏꀥꉢꀥꋓꇰꃲ